ಫೋಟೋ ತೆಗೆಸಿಕೊಳ್ಳುವುದೇ ವಿಶೇಷ ಸಂಭ್ರಮವಾಗಿದ್ದ ಕಾಲವೂ ಒಂದಿತ್ತು. ನಾವೆಲ್ಲ ಶಾಲೆಗೆ ಹೋಗುತ್ತಿದ್ದಾಗ ಅದೊಂದು ವಿಶೇಷ ವಾರ್ಷಿಕ ಆಚರಣೆ. ಛಾಯಾಗ್ರಾಹಕರು ಶಾಲೆಗೆ ಬರುವುದು, ಅವರಿಂದ ಫೋಟೋ ತೆಗೆಸಿಕೊಳ್ಳಲು ನಾವೆಲ್ಲ ಸಿದ್ಧವಾಗಿರುವುದು - ಇದೆಲ್ಲ ಅಂದಿನ ಕಾಲಕ್ಕೆ ದೊಡ್ಡ ಸಂಗತಿಗಳು.
ಆಮೇಲೆ ಮನೆಗಳಿಗೂ ಕ್ಯಾಮೆರಾ ಬಂತು. ಅದು ಡಿಜಿಟಲ್ ಆದಮೇಲಂತೂ ಕ್ಯಾಮೆರಾಗಳ ಸಂಖ್ಯೆ ಇನ್ನಷ್ಟು ಜಾಸ್ತಿಯಾಯಿತು. ಫೋಟೋ ತೆಗೆಸಿಕೊಳ್ಳುವುದು ವಿಶೇಷ ಎನ್ನುವ ಭಾವನೆ ಹೋಗಿ ದಿನನಿತ್ಯದ ಅನುಭವಗಳ ಪೈಕಿ ಅದೂ ಒಂದು ಎನ್ನಿಸಲು ಶುರುವಾಯಿತು.
