ತಂತ್ರಜ್ಞಾನ ಪ್ರಪಂಚದಲ್ಲಿ ಪ್ರತಿ ಕ್ಷಣವೂ ಒಂದಲ್ಲ ಒಂದು ಬಗೆಯ ಸಂವಹನ ನಡೆಯುತ್ತಿರುತ್ತದೆ. ನಮ್ಮ ಮನೆಗಳ ಉದಾಹರಣೆಯನ್ನೇ ತೆಗೆದುಕೊಂಡರೆ ಮೊಬೈಲ್ ಫೋನು, ಕಂಪ್ಯೂಟರು, ಟೀವಿ ಮುಂತಾದ ಹಲವಾರು ಬಗೆಯ ಸಾಧನಗಳೊಡನೆ ನಾವು ಪ್ರತಿದಿನವೂ ವ್ಯವಹರಿಸುತ್ತೇವೆ.
ಈ ವ್ಯವಹಾರವೆಲ್ಲ ತಂತಿಗಳ ಮೂಲಕವೇ ಆಗುವಂತಿದ್ದರೆ ಹೇಗಿರುತ್ತಿತ್ತು? ಮೊಬೈಲ್ ಫೋನುಗಳನ್ನು ಸಂಪರ್ಕಿಸುವ ನೂರಾರು ತಂತಿಗಳು ಪ್ರತಿ ಮೊಬೈಲ್ ಟವರಿನಿಂದಲೂ ಹೊರಟು ಬೀದಿಯಲ್ಲೆಲ್ಲ ಅವಾಂತರ ಸೃಷ್ಟಿಸುತ್ತಿದ್ದವು; ಟೀವಿಯನ್ನೂ ರಿಮೋಟನ್ನೂ ಸಂಪರ್ಕಿಸುವ ತಂತಿ ದಿವಾನಖಾನೆಯಲ್ಲಿ ಓಡಾಡುವಾಗೆಲ್ಲ ನಮ್ಮ ಕಾಲಿಗೆ ತೊಡರಿಕೊಳ್ಳುತ್ತಿತ್ತು!
