ಯಾಕಾಗತ್ತೆ "ಏನೋ ಒಂಥರಾ"?

ಪರೀಕ್ಷೆ, ಸಂದರ್ಶನಗಳಿಗೆ ಹೋಗುವ ಮುನ್ನ ಹೊಟ್ಟೆಯೊಳಗೆ ವಿಚಿತ್ರವಾದ ತಳಮಳವಾಗುವುದು ಅಥವ "ಏನೋ ಒಂಥರಾ ಆಗುವುದು" ನಮ್ಮಲ್ಲಿ ಅನೇಕರ ಅನುಭವಕ್ಕೆ ಬಂದಿರುವ ವಿಷಯ. ನಮ್ಮ ಹೊಟ್ಟೆಯೊಳಗಿರುವ ನರಗಳ ದಟ್ಟವಾದ ಜಾಲ ಹೊರಡಿಸುವ ಸಂಕೇತಗಳು ಈ ತಳಮಳಕ್ಕೆ ಕಾರಣವಾಗುತ್ತವೆ. ಎಂಟೆರಿಕ್ ನರಮಂಡಲ ಎಂಬ ಹೆಸರಿನ ಈ ಜಾಲ ಹೆಚ್ಚೂಕಡಿಮೆ ನಮ್ಮ ಮಿದುಳಿನಂತೆಯೇ ಕೆಲಸಮಾಡುತ್ತದಂತೆ. ಆತಂಕದ ಸಂದರ್ಭಗಳಲ್ಲಿ ಮಿದುಳಿನಂತೆಯೇ ಗಾಬರಿಗೊಳ್ಳುವ ಈ ನರಮಂಡಲ ಕೆಲವು ರಾಸಾಯನಿಕಗಳನ್ನು ಹೊರಸೂಸಿ ನಮ್ಮ ಹೊಟ್ಟೆಯಲ್ಲಾಗುವ ವಿಚಿತ್ರ ಅನುಭವಕ್ಕೆ ಕಾರಣವಾಗುತ್ತದೆ ಎಂದು ತಜ್ಞರು ಹೇಳುತ್ತಾರೆ.