ಕಂಪ್ಯೂಟರ್ ಫೊರೆನ್ಸಿಕ್ಸ್

ಟಿ ಜಿ ಶ್ರೀನಿಧಿ

ಫೊರೆನ್ಸಿಕ್ಸ್ ಅಥವಾ ಅಪರಾಧಪತ್ತೆ ಶಾಸ್ತ್ರ - ಅಪರಾಧಗಳು ನಡೆದ ಸಂದರ್ಭದಲ್ಲಿ ಅಲ್ಲಿ ಲಭ್ಯವಿರಬಹುದಾದ ಕುರುಹುಗಳನ್ನು ಪತ್ತೆಮಾಡಿ, ಅಧ್ಯಯನ ನಡೆಸಿ ಅಪರಾಧಿಗಳನ್ನು ಪತ್ತೆಹಚ್ಚಲು ನೆರವು ನೀಡುವ ವಿಜ್ಞಾನದ ಒಂದು ಶಾಖೆ. ಸಮಾಜದ ದುಷ್ಟಶಕ್ತಿಗಳನ್ನು ಹಿಡಿತದಲ್ಲಿಟ್ಟು ಸಾಮಾಜಿಕ ಆರೋಗ್ಯ ಕಾಪಾಡುವಲ್ಲಿ ಫೊರೆನ್ಸಿಕ್ಸ್ ವಹಿಸುವ ಪಾತ್ರ ಬಲು ಮಹತ್ವದ್ದು.
ಆದರೆ ತಂತ್ರಜ್ಞಾನ ಬೆಳೆದಂತೆ ಅಪರಾಧಗಳ ಸ್ವರೂಪವೇ ಬದಲಾಗುತ್ತಿದೆ. ಗಣಕಗಳು ಹಾಗೂ ವಿಶ್ವವ್ಯಾಪಿ ಜಾಲದ ನೆರವಿನಿಂದ ನಡೆಯುತ್ತಿರುವ ಅದೆಷ್ಟೋ ಬಗೆಯ ಹೈಟೆಕ್ ಅಪರಾಧಗಳು ನಾಗರಿಕ ಸಮಾಜದ ನೆಮ್ಮದಿಯನ್ನೇ ಹಾಳುಮಾಡಲು ಹೊರಟಿವೆ.
ಇಂಥ ಅಪರಾಧಗಳನ್ನು ಪತ್ತೆಮಾಡುವ ಉದ್ದೇಶದಿಂದ ರೂಪಗೊಂಡಿರುವ ಹೊಸ ಕ್ಷೇತ್ರವೇ ಕಂಪ್ಯೂಟರ್ ಫೊರೆನ್ಸಿಕ್ಸ್. ಡಿಜಿಟಲ್ ಫೊರೆನ್ಸಿಕ್ಸ್ ಎಂದೂ ಪರಿಚಿತವಾಗಿರುವ ಈ ಕ್ಷೇತ್ರ ಗಣಕಗಳಲ್ಲಿ ಶೇಖರವಾಗಿರುವ ಮಾಹಿತಿಯ ಅಧ್ಯಯನನಡೆಸಿ ಸೈಬರ್ ಅಪರಾಧಗಳನ್ನು ಪತ್ತೆಮಾಡುವ ಉದ್ದೇಶ ಹೊಂದಿದೆ. ಕ್ರೆಡಿಟ್ ಕಾರ್ಡ್ ವಂಚನೆ, ಹ್ಯಾಕಿಂಗ್, ಡಿನಯಲ್ ಆಫ್ ಸರ್ವಿಸ್ ಮೊದಲಾದ ಅಪರಾಧಗಳು ಅಥವಾ ಗಣಕದ ನೆರವು ಪಡೆದು ಭಯೋತ್ಪಾದನೆಯಂತಹ ಕೃತ್ಯಗಳು ನಡೆದ ಸಂದರ್ಭದಲ್ಲಿ ಕಂಪ್ಯೂಟರ್ ಫೊರೆನ್ಸಿಕ್ಸ್ ವಹಿಸುವ ಪಾತ್ರ ಬಲು ಮಹತ್ವದ್ದು.